Helgin sem var að líða

Helgin sem var að líða

Flotbauja losnaði frá festingum sínum

Pysjur enn að finnast

Átakaveður var í Vestmannaeyjum á laugardag, svo slæmt var veðrið að flotbaujann við sem liggur við Skansinn losnaði og liggur á þurru í skansfjörunni. Sjófarendur þurfa ei að óttast því lýsing frá Listaverki Gríms Marinó lýsir þeim veginn.

Þó svo komið sé í miðjan september eru lundapysjurnar enn að enda, krökkum til mikillar og gleði og eru pysjurnar óvenjulengi á ferli í ár, þessar ungu dömur voru einmitt á leiðinni inn á Eiði að sleppa þessum tveimur vel gerðu pysjum.

Vestmannaeyingum fjölgaði um 2 um helgina þegar tvær andanefju komu sér vel fyrir í Friðarhöfn og ekki var annað að sjá en að þær hafi unað sér vel þar.

14. september kl. 15.07 | vaktin.net |

Nýtt tölvusnið myndtæki

Í gærmorgun var tekið í notkun tölvusnið myndatæki hjá Heilbrigðis stofnun Vestmannaeyja, tveir sjúklingar voru mættir til myndatöku í tækinu.
Aðalbjörg Skarphéðinsdóttir röntgentæknir stjórnaði tækjum og tólum og allt gekk vel með myndatöku Þorkels, næst kom Valgerður og vel gekk með hana, en auk myndatökunnar þurfti að sprauta litarefni inn í hana þegar myndirnar voru teknar.

Tölvusnið myndatækið er beintengt til Reykjavíkur og þar eru röntgenlænknar sem lesa úr myndunum, fyrsta bráðabirgða niðurstaða kom úr Reykjavík 1 klst. eftir að myndirnar voru teknar af Valgerði.

Læknar hér í Eyjum geta lesið úr myndunum t.d. ef um beinbrot er að ræða, en í flóknari myndatökum er lesið úr myndunum í Reykjavík.
 
Í báðum þessum myndatökum hefðu sjúklingar orðið að fara til Reykjavíkur til myndatöku hefði þetta tæki ekki verið á staðnum, þetta tæki er góð viðbót fyrir sjúkrahúsið og á eftir að vera mikill sparnaður fyrir íbúa þessa byggðarlags.

2 hvalir í Vestmannaeyjahöfn

| 16. september kl. 18.29 | visir.is | Hvalir vekja athygli í Vestmannaeyjahöfn Óvanalegrar hvalagengdar hefur orðið vart í höfninni í Vestmannaeyjum. Tvær ólíkar hvalategundir virðast hafa tekið sér bólfestu um stund í innsta hluta hafnarinnar. Hvalirnir hafa vakið mikla athygli hjá bæjarbúum og hefur fjöldi manna lagt leið sína niður á bryggju. Bæði er það að sjá tvær hvalategundir í þetta nánu samfélagi og svo hitt að önnur tegundin er væntanlega djúpsjávarhvalur sem getur kafað álíka djúpt og búrhvalur en hin tegunin er skíðishvalur sem lifir á grunnsævi. Fólk safnaðist saman á bryggjunni til þess að skoða og mynda hvalina, enda ekki á hverjum degi sem tækifæri gefst til slíkra hluta. Menn telja líklegustu skýringuna þá að hvalirnir hafi lennt í hafvillum og villst inn í höfnina, en það mætti líka spyrja hvort þessa hvalagengd megi túlka sem jákvætt merki varðandi marslið.

ÍBV í eldlínuni um helgina

15. september kl. 13.33

 

Leik ÍBV og Grindavíkur frestað

Leikið á morgun en óljóst með leiktíma

Leik ÍBV og Grindavíkur í 1. deild karla í knattspyrnu, sem átti að hefjast núna klukkan 14.00 hefur verið frestað til morguns.  Ekki hefur verið flugfært milli lands og Eyja í dag eða í morgun og enn er ófært.  Líklegt er að leikurinn verði á sama tíma á morgun en það hefur ekki fengist staðfest.

Síðar í dag fer svo fram handboltaleikur milli ÍBV og Fram í N1-deildinni.  Ekki hefur verið tekin ákvörðun um það hvort fresta eigi þeim leik en um leið og þær upplýsingar liggja fyrir verður greint frá því hér á www.sudurland.is/eyjafrettir og sömuleiðis með nýjan leiktíma í knattspyrnuleiknum.

 

15. september kl. 14.32

 

Báðum leikjunum frestað

Á sama tíma á morgun

Nú er komið í ljós að bæði knattspyrnu- og handboltaleik sem fram áttu að fara í Vestmannaeyjum í dag hefur verið frestað.  Í knattspyrnunni átti ÍBV að leika gegn Grindavík en í handboltanum átti ÍBV að spila gegn Fram í fyrsta leik Íslandsmótsins.  Báðir leikirnir munu hins vegar fara fram á morgun, á sama tíma.

Þannig hefst hinn mikilvægur leikur í knattspyrnunni klukkan 14.00 en handboltaleikurinn klukkan 17.00.  Eins og áður hefur komið fram er stuðningsmönnum ÍBV boðið á leikina báða af nokkrum fyrirtækjum í Eyjum og stendur það tilboð að sjálfsögðu áfram.  Forráðamenn liðanna hvetja stuðningsmenn ÍBV að fjölmenna á leikina báða, nú er engin afsökun enda frítt inn.

1. deild karla

Sanngjarn sigur gegn Grindvíkingum

Enn er von

Leikmenn ÍBV halda voninni enn lifandi um úrvalsdeildarsæti en í dag lögðu Eyjamenn Grindvíkinga að velli 2:1 á Hásteinsvellinum.  Aðstæður til knattspyrnuiðkunnar í dag voru nokkuð erfiðar, austan rok og skítakuldi.  Hins vegar var leikurinn ágætlega fjörugur og úrslitin góð.

 

Grindvíkingar byrjuðu þó betur í leiknum og strax á 9. mínútu var staðan orðin 0:1.  Mounis Abandour skoraði markið með glæsilegu skoti utan teigs, algjörlega óverjandi fyrir Henrik Bödker, Danann í marki ÍBV.  En segja má að eftir þetta hafi Eyjamenn tekið völdin á vellinum þrátt fyrir að leika gegn vindinum.  Tuttugu mínútum eftir mark Grindvíkinga jöfnuðu Eyjamenn svo en eftir glæsilega rispu Atla Heimissonar upp vinstri kantinn kom Ian Jeffs boltanum loksins í netið, klárlega ekki fallegasta mark sumarsins en það telur engu að síður.
Aðeins þremur mínútum síðar átti Atli svo aftur góða rispu upp kantinn og að lokum barst boltinn til Andra Ólafssonar sem skaut framhjá úr upplögðu færi og staðan í hálfleik var því 1:1.

Síðari hálfleikur fór fjörlega af stað, Eyjamenn voru mun meira með boltan framan af hálfleiknum en sköpuðu sér ekki mörg færi undan vindinum.  Á 61. mínútu vildu Eyjamenn fá víti þegar boltinn virtist fara í hönd Óla Stefáns Flóventssonar en ekkert var dæmt.  Tíu mínútum síðar kom svo sigurmarkið en þá fékk Augustine Nsumba boltann við vítateig gestanna, sneri af sér varnarmann og skaut í annann.  Ian Jeffs náði hins vegar frákastinu og lagði boltann laglega í netið og skoraði þar með annað mark sitt í leiknum.

Eftir þetta lögðu Eyjamenn áherslu á að halda fengnum hlut og lögðu reyndar á köflum full miklar áherslu á varnarleikinn því um tíma voru níu af tíu útileikmönnum liðsins komnir inn í eigin vítateig.  En Eyjamenn fengu nokkrar skyndisóknir og þegar komið var fram yfir venjulegan leiktíma komst varamaðurinn Ingi Rafn Ingibergsson einn í gegn.  Hann náði að leika á markmanninn en í stað þess að skjóta strax á markið ákvað hann að leggja boltann fyrir sig og varnarmaður komst fyrir og sóknin rann út í sandinn.  En stuttu síðar var leikurinn úti og Eyjamenn fögnuðu mikilvægum sigri en gestirnir gengu vonsviknir af velli, enda hefði jafntefli dugað þeim til að tryggja sér sæti í úrvalsdeild og gera út um vonir ÍBV.

Enn er von
Eins og áður sagði eiga Eyjamenn enn von um að komast í úrvalsdeild að ári.  ÍBV er enn sem fyrr í fjórða sæti, aðeins þremur stigum á eftir Grindavík og fjórum á eftir Fjölni.  Bæði eiga þau hins vegar leik til góða en liðin mætast einmitt næstkomandi þriðjudag í Grindavík.   Hins vegar er deginum ljósara að ÍBV verður að vinna báða leikina sem eftir eru, annars vegar gegn Þrótti á útivelli næstkomandi laugardag og gegn Fjölni á heimavelli föstudaginn 28. september. 

Staðan:
1. Þróttur 20 14 2 4 42:22 44
2. Fjölnir 19 13 3 3 54:20 42
3. Grindavík 19 13 2 4 36:18 41
4. ÍBV 20 11 5 4 36:19 38
5. Fjarðabyggð 20 10 4 6 22:14 34
6. Þór 20 5 6 9 31:37 21
7. Stjarnan 19 5 4 10 36:39 19
8. Leiknir R. 19 4 7 8 19:25 19
9. Víkingur Ó. 20 5 4 11 22:32 19
10. Njarðvík 20 3 8 9 19:30 17
11. Reynir S. 20 3 7 10 22:52 16
12. KA 20 4 4 12 12:43 16

16. september kl. 19.02

 

Okkar markmið að halda möguleikanum opnum eins lengi og við getum

segir Heimir Hallgrímsson, þjálfari ÍBV og segir margt jákvætt að gerast í knattspyrnunni

Heimir Hallgrímsson var að vonum ánægður með sigurinn gegn Grindavík í dag en Heimir segir þó að leikurinn breyti stöðu liðsins ekki, enn þarf ÍBV að vinna alla sína leiki og treysta á úrslit úr öðrum ef liðið ætlar sér upp.  Þjálfarinn var ekki sáttur við dómgæslunar þegar blaðamaður ræddi við hann og var sömuleiðis óhress með hvernig ÍBV byrjaði leikinn.

 

„Við spiluðum kannski ekki alveg eins og við ætluðum. Við lendum á móti vindi í fyrri hálfleik og þetta var erfitt til að byrja með. Grindvíkingarnir komu grimmir inn í leikinn og við áttum erfitt með að sækja til að byrja með. Svo gaf dómarinn þeim þetta mark með því að blokka varnarmanninn okkar þegar þeir skora. Mér finnst nú lágmark að menn biðjist afsökunar á því, þó að það verði ekki tekið til baka þá er lágmark að biðjast afsökunar. Annars fannst mér halla mjög á okkur í dómgæslunni. Ég hef nú ekki lagt það í vana minn að kvarta undan dómgæslunni en ég verð að segja alveg eins og er að mér fannst halla mjög á okkur."

Heimir sagði ennfremur að Eyjamenn hafi ekki breytt um taktík í síðari hálfleik þrátt fyrir að leika með vindinn í bakið.  „Þetta var bara spurning um hvar liðið liggur og við lágum bara framar í seinni hálfleik. Við þekkjum orðið þennan vind svo vel að við verðum að spila niðri. Þegar við gerðum það þá gekk vel en um leið og við settum hann upp í loft þá gekk illa."

En það hlýtur að vera sætt að leggja Grindavík að velli sem hefur verið á toppi deildarinnar í nánast allt sumar.  „Þetta var sætur sigur og við eigum ennþá möguleika á að vera fyrir ofan Grindavík. En þessi sigur í raun breytir engu fyrir okkur. Staðan okkar er nákvæmlega sú sama og hefur verið síðustu fjóra leiki, ef við töpum stigum þá erum við úr leik. Við erum lifandi enn, með sigri gegn Þrótti verðum við enn á lífi í þessari baráttu, sama hvernig aðrir leikir fara og það er okkar markmið það sem eftir er, að halda möguleikanum opnum eins lengi og við getum."

Og Heimir segir að hið jákvæða, bæði í herbúðum ÍBV og utan þeirra skili sér í bættum leik.  „Það sem er jákvætt í þessu hjá okkur er að við erum að nýta þau færi sem við fáum. Í undanförnum fjórum leikjum höfum við verið að skora nokkuð mörg mörk og það er margt jákvæðara í okkar sóknarleik núna en var kannski fyrr í sumar. Það er líka jákvæðara andrúmsloft í þessu, bæði hjá okkur og í bænum gagnvart knattspyrnunni eins og með knattspyrnuhúsið, og það smitast til leikmanna," sagði Heimir að lokum.

16. september kl. 19.07

N1-deildin:

Klaufalegt í lokin hjá ÍBV

köstuðu frá sér möguleika á sigri með tveimur brottvísunum

Segja má að Eyjamenn hafi kastað frá sér möguleika á sigri þegar liðið lék gegn Fram í dag.  ÍBV var undir allan síðari hálfleikinn en á lokamínútunum jafnaði Zilvinas Grieze metin, 29:29 þegar aðeins tæpar tvær mínútur voru eftir af leiknum.  Eyjamenn voru tveimur leikmönnum fleiri og höfðu því alla möguleika á sigri en tveir frekar klaufalegir brottrekstrar undir lokin gerði út um vonir Eyjamanna.  Framarar skoruðu síðustu þrjú mörk leiksins og unnu 29:32. 

Eyjamenn komu í raun mörgum á óvart í dag og Framarar, sem undanfarin ár hafa verið eitt af sterkari liðum landsins, þurftu virkilega að hafa fyrir sigrinum.  Þannig var nánast jafnt á öllum tölum í fyrri hálfleik en Framarar voru þó einu marki yfir í hálfleik, 14:15.

Gestirnir fóru svo mun betur af stað í síðari hálfleik, komust mest fimm mörkum yfir en með mikilli baráttu náðu Eyjamenn að vinna sig aftur inn í leikinn.  Það var ekki síst fyrir tilstilli Friðriks Þór Sigmarssonar, en hann fór hreint á kostum í markinu á lokakaflanum eftir að hafa leyst Kolbein Arnarson af hólmi, sem varði líka vel í leiknum.  Þrátt fyrir tapið geta Eyjamenn borið höfuðið hátt, liðið er klárlega litla liðið í deildinni í vetur en með sömu baráttu er ljóst að mörg af "betri" liðum deildarinnar munu tapa stigum í Eyjum.

Mörk ÍBV: Zilvinas Grieze 7, Janis Grisnavos 6, Sindri Haraldsson 5, Grétar Þór Eyþórsson 4, Sigurður Bragason 3, Svavar Vignisson 2, Eyþór Björgvinsson 1, Leifur Jóhannesson 1.
Varin skot: Kolbeinn Arnarson 12, Friðrik Þór Sigmarsson 7

16. september kl. 20.42

N1. deildin:

Ætlum að hafa gaman af þessu og bæta okkur í hverjum leik

segir Sigurður Bragason, fyrirliði ÍBV eftir fyrsta leik í handboltanum

Þrátt fyrir tapið í dag var Sigurður Bragason, fyrirliði ÍBV nokkuð brattur.  Hann tekur undir það að búast megi við erfiðum vetri og að byrjunin á Íslandsmótinu verði erfið.    „Jú vissulega. Við vorum að spila gegn hörkuliði, sem var Íslandsmeistari fyrir tveimur árum og þriðja sæti í fyrra. Auk þess höfum við misst sterka leikmenn frá því í fyrra þannig að jú, það mátti kannski alveg búast við þessu."

En þið náðuð að hanga í Frömurum lengst af í leiknum.
„Þetta var ekkert hangs hjá okkur. Við vorum búnir að jafna þegar þetta leiðindaatvik kemur þegar tvær mínútur eru eftir og við tveimur fleiri. Þá fæ ég brottvísun, sem var rangur dómur að mínu mati en að öðru leyti stóðu þeir sig vel dómararnir. Svo verða einhver læti á bekknum og við missum annann út af og verðum fjórir á móti fjórum. Það var í raun í lagi þangað til að þeir fengu sína menn inn á aftur."

Var þessi vendipunktur kannski reynsluleysi nýliðanna?
„Þetta var nú ég sem fékk brottvísunina og ég er þrítugur þannig að ég efast um að þetta hafi verið reynsluleysi. Svo fáum við stráka inn eins og Friðrik Þór Sigmars Þrastarson og hann kemur okkur einfaldlega einn í leikinn aftur. Svo var stemmningin frábær, bæði hjá okkur og áhorfendum og við bara berjumst."

Hvað með veturinn, verður hann erfiður?
„Já klárlega og við vitum það. En við ætlum okkur að hafa gaman af þessu, bæta okkur í hverjum leik og gera okkar besta. Við erum klárlega litla liðið í deildinni en það er bara gaman að stríða þeim eins og við gerðum í dag. Framarar voru með dómarana með sér, þeir þurftu þess til að vinna okkur," sagði Sigurður að lokum.

 

| 16. september kl. 19.22 | mbl.is |

Þórlindur Kjartansson nýkjörinn formaður SUS

Eyjamaðurinn Skapti Örn Ólafsson var kosinn í stjórn fyrir suðurkjördæmi.

Þórlindur Kjartansson var kjörinn formaður Sambands ungra sjálfstæðismanna með 90,5 prósent atkvæða á sambandsþingi ungra sjálfstæðismanna á Seyðisfirði í dag. Alls greiddu 171 ungir sjálfstæðismenn atkvæði á þinginu og hlaut Þórlindur 152 atkvæði.

Teitur Björn Einarsson var kjörinn fyrsti varaformaður og hlaut hann 129 atkvæði.

Sjálfkjörið var í öll stjórnarsæti. 26 taka sæti í stjórn og 15 í varastjórn. Þá var í gær samþykkt sú breyting á lögum S.u.s. að formenn kjördæmasamtaka, eða fulltrúar stjórna þeirra, hafa sæti í stjórn sambandsins.

16. september kl. 18.30 | eyjar.net |

1. deildin: ÍBV sigraði Grindavík

- www.gras.is

ÍBV - Grindavík 2-1
0-1 Paul McShane
1-1 Ian Jeffs
2-1 Ian Jeffs

ÍBV á enn möguleika á að komast upp í Landsbankadeild karla eftir góðan 2-1 sigur á Grindavík í eyjum í dag.  Paul McShane kom Grindvíkingum yfir en 2 mörk frá Ian Jeffs tryggðu heimamönnum mikilvægan sigur.  Eftir sigurinn eru Eyjamenn aðeins þrem stigum á eftir Grindavík sem að situr í þriðja sæti með 41 stig.

| 16. september kl. 08.01 | eyjar.net |

Staðbundinn veðurspá úr Brandinum

- veðrið í úteyjum við Heimaey

Engin þjóð er eins upptekin af veðri og sú íslenska og á mörgum heimilum má heyra saumnál detta þegar veðurfréttir eru í sjónvarpi eða útvarpi. Stórhöfði í Vestmannaeyjum er líklega sú veðurstöð á Íslandi og þó víðar væri leitað sem fær hvað flesta metra á sekúndu í gegnum sitt kerfi.

En Norðmenn hafa líka áhuga á veðri og eru þeir búnir að útbúa staðbundnar veðurspár fyrir 7 milljónir punkta í heiminum og eru Vestmannaeyjar og Surtsey eru að sjálfsögðu meðal þessara punkta.

En það eru staðir í Vestmannaeyjum þar sem veðráttan er mikið til umræðu enda veðrið helsti áhrifavaldur á veiði. En það eru úteyjarnar við Vestmannaeyjar. Nú er hægt að sjá staðbundna veðurspá t.d. fyrir Brandinn, Bjarnarey, Elliðaey, Suðurey og Hellisey.

En Norðmönnum þótti ekki taka því að gefa upp staðbundna spá fyrir Álsey.

15. september kl. 13.29 | eyjar.net |

Vinir Ketils Bónda opna dansskóla í eyjum

- laugardags slúður

Óstaðfestar heimildir úr vinnuskúr Steina og Olla gefa það til kynna að félagsskapurinn Vinir Ketils Bónda hafi sótt um styrk hjá Vaxtarsamningi Vestmannaeyja og Suðurlands vegna reksturs á Dansskóla Ketils Bónda.

Félagar Ketils Bónda hafa undanfarið verið að skoða húsnæði undir starfsemi sína sögur herma að þeir félagar horfi hýru auga til húsnæðis Betel safnaðarins við Faxastíg.

Helgi Ólafsson forseti Vinir Ketils Bónda verður skólastjóri dansskólans.

Helstu dansar sem kenndir verða eru Forseta dansinn, Mjaðmahnykkir HKE, Bóndadansinn, Journey - línan og  Magadans,

Sýnishorn af dönsunum eru hér að neðan:

Forsetadansinn:

Mjaðmahnykkir:

Bóndadansinn:

15. september kl. 05.46 | eyjar.net |

Hnefaleikafélagið fær aðstöðu í Félagsheimilinu

Hnefaleikafélag Vestmannaeyja hefur fengið framtíðar húsnæði undir æfingar sínar en félagið hefur verið á "götunni" undanfarna mánuði eftir að það missti síðasta æfingarhúsnæði. Hnefaleikafélagið hefur nú fengið til afnota aðstöðu á efstu hæð í Félagsheimilinu.

Hnefaleikafélagið er ungt en öflugt félag og mun þessi nýja aðstaða þeirra efla félagið til muna. Félagið fékk að gjöf frá Guðmundi Arasyni og fjölskyldu æfingahring og annan útbúnað til iðkunar á hnefaleikum en Guðmundur var búsettur í Vestmannaeyjum sem krakki. Guðmundur var Íslandsmeistari í hnefaleikum 1943 og keppti meðal annars við margfaldan ólympíumeistara í hnefaleikum.

Sæþór Ólafur Pétursson varð Íslandsmeistari í hnefaleikum á síðasta ári og varð hann valinn Íþróttamaður ársins í Vestmannaeyjum 2006. Þessi árangur Sæþór er frábær þegar litið er á þá umgjörð og aðstöðu sem hnefaleikafélagið hafði til umráða á síðasta ári.

Æfingar í hjá hnefaleikafélaginu verða alla daga nema föstudaga frá 17:00 - 20:00 og eru allir hjartanlega velkomnir, bæði stelpur og strákar.

14. september kl. 12.58 | visir.is |

Vinnslustöðin óskar eftir afskráningu

Stjórn Vinnslustöðvarinnar telur félagið ekki uppfylla lengur skráningarskilyrði um fjölda hluthafa og dreifða eignaraðild og hefur farið þess á leit við Kauphöllina að hlutabréf félagsins verði tekin af markaði. Afskráningin var samþykkti á stjórnarfundi Vinnslustöðvarinnar í gær.

Þá telur stjórnin ennfremur að lítil sem engin velta sé með hlutabréf í félaginu og ekki útlit fyrir að hún muni aukast. Vegna beins og óbeins kostnaðar sem félagið beri vegna skráningar hluta þess á
skipulagðan verðbréfamarkað þjóni hún því litlum tilgangi fyrir
hluthafa félagsins.

Eyjamenn, sem Sigurgeir B. Kristgeirsson, framkvæmdastjóri Vinnslustöðvarinnar, fer fyrir á um fimmtíu prósent hlutafjár í Vinnslustöðinni en Stilla, félag í eigu bræðranna Guðmundar og Hjálmars Kristjáns­sona frá Rifi, á um 32 prósent í félaginu.